കൊച്ചി: വായു മലിനീകരണം രൂക്ഷമായതോടെ പുകമറയില് കൊച്ചി നഗരം. ഇന്നത്തെ എയര് ക്വാളിറ്റി ഇൻഡക്സ് - എക്യുഐ പ്രകാരം കൊച്ചിയിലെ വായുവിന്റെ ഗുണനിലവാരം അനാരോഗ്യകരമായി സ്ഥിതിയിലാണ്. എക്യുഐ വെബ്സൈറ്റില് നാളുകളായി കൊച്ചിയിലെ വായു അനാരോഗ്യകരം എന്നാണ് രേഖപ്പെടുത്തിയിരിക്കുന്നത്.
ഇന്നു കച്ചേരിപ്പടിയിലെ മാത്രം എയര് ക്വാളിറ്റി ഇന്ഡക്സ് 169 ആണ്. അനാരോഗ്യകരമായ ഈ വായു ഗുണനിലവാരം ആസ്ത്മയും ശ്വാസകോശ രോഗമുള്ളവര്ക്കും ശ്വാസതടസം ഉണ്ടാക്കും. ഹൃദ്രോഗമുള്ളവര്ക്കും കുട്ടികള്ക്കും പ്രായമായവര്ക്കും അസ്വസ്ഥതയുണ്ടാക്കിയേക്കും. ഐരാപുരം - 154, അങ്കമാലി - 152, പോത്താനിക്കാട് - 132, ഏലൂര് - 106 എന്നിവിടങ്ങളിലെ എയര് ക്വാളിറ്റി ഇൻഡക്സും മോശമാണ്. ഏലൂര്, ഇടയാര്, കരിമുകള്, അമ്പലമുകള് തുടങ്ങിയ വ്യവസായ മേഖലകളിലെ വായു കൊച്ചിയെ ശ്വാസംമുട്ടിക്കാന് തുടങ്ങിയിട്ട് കുറെക്കാലമായി.
അപകടസ്ഥിതിയിലേക്ക്
തുടര്ച്ചയായി നഗരത്തിലെ വായുവിന്റെ ഗുണനിലവാരം കുറഞ്ഞു കൊണ്ടിരിക്കുകയാണ്. കൊച്ചി മെട്രോയുടെ രണ്ടാം ഘട്ടമായ പിങ്ക്ലൈനിന്റെ നിര്മാണവും അതിനൊപ്പംതന്നെ റോഡ് നവീകരണവും നടക്കുന്നതിനാല് സ്ഥിതി കൂടുതല് വഷളാണ്. എറണാകുളം സൗത്ത്, നോര്ത്ത്, ആലുവ റെയില്വേ സ്റ്റേഷനുകളിലും അറ്റകുറ്റപണികളും നടക്കുന്നുണ്ട്. മാത്രമല്ല, മാലിന്യങ്ങള് പൊതുഇടത്തില് വലിച്ചെറിയുന്നതും പതിവുകാഴ്ച. വായു മലിനീകരണം കൂടാന് വാഹനങ്ങള്ക്ക് വ്യാജ മലിനീകരണ സര്ട്ടിഫിക്കറ്റുകള് നല്കുന്നത് കൊണ്ടാണെന്ന ആക്ഷേപവും നേരത്തെ ഉയര്ന്നിരുന്നു.
ആശങ്ക കനക്കുന്നു
പൊടിപടലങ്ങള് നിറഞ്ഞ വായു ഡല്ഹിയുടേതിനു സമാനമായി മാറുമോ എന്ന ആശങ്കയും നിലവില് സൃഷ്ടിക്കുന്നുണ്ട്. അതേസമയം, കൊച്ചിയിലെ വായു ഏറ്റവുമധികം മലിനമായത് കഴിഞ്ഞ വര്ഷം ഡിസംബറില് ആയിരുന്നു. 163 ആയിരുന്നു എക്യുഐ. ക്രിസ്മസ് ആഘോഷവും പപ്പാഞ്ഞികളെ കത്തിക്കലും കൂടി ആയതോടെ കൊച്ചിയിലെ വായു കൂടുതല് മലിനമായി. 2020 സെപ്റ്റംബറില് ആയിരുന്നു കൊച്ചിയില് ഏറ്റവും കുറഞ്ഞ മലിനീകരണ തോത് രേഖപ്പെടുത്തിയത്. 40 ആയിരുന്നു എക്യുഐ.
കേരളം തെരഞ്ഞെടുപ്പ് ചര്ച്ചകളിലേക്കും ശബരിമല, രാഹുല് മാങ്കൂട്ടത്തില് തുടങ്ങിയ വിഷയങ്ങളിലും തിരക്കിലാണ്. എന്നാല്, ദിവസേനെ കേരളത്തിലെ പ്രധാന നഗരങ്ങളിലെയെല്ലാം വായു വിഷലിപ്തമാവുകയാണ് എന്ന കാര്യം ആരും ശ്രദ്ധിക്കുന്നതേയില്ല. ഇങ്ങനെ പോവുകയാണെങ്കില് വൈകാതെ പുറത്തിറങ്ങാൻ ഇനി എയര് പ്യൂരിഫയറുകളെയും എന്95 മാസ്കുകളെയും ആശ്രയിക്കേണ്ടി വരും.
Deepika
E-paper LOGIN
LOGIN
